Sampe skarang ini, om susupo blum abis pikir soal ini Jokowi, Gubernur Jakarta yang baru dilantik babarapa minggu lalu. Barapa hari abis dilantik, om susupo ada nonton di tv, ini Jokowi langsung maso kalur kampung, lorong deng sagala rupa komplek di Jakarta. Dia bilang, mo pigi liat kondisi aslinya itu ibukota republik. Yah dia bilang jalan-jalan, sekaligus mo suka liat ini kondisi asli, supaya tau persis apa yang musti dibikin sama depe wilayah deng buat depe rakyat.
Dia juga langsung maso kaluar kantor lurah deng kantor camat, buat mo baliat itu kondisi pagawe lengkap deng depe model pelayanan buat rakyat kacili. Dan hasilnya, dia dapat ini pagawe-pagawe yang malas maso kantor atau suka babalambat maso kantor.
Yang om susupo anggap luar biasa, ada lagi berita di tv malam kamis kamarin, soal Jokowi pe cara batarima pengunjuk rasa. Biasa, ada yang om susupo liat rupa pusing bagimana depe cara mo bahadapi unjuk rasa. Ada di tampat laen yang sampe depe pajabat basambunyi, te mo baku temu deng tukang demo.
Tapi bukan Jokowi kalu te bikin yang luar biasa. Pas ada unjuk rasa hari Rabu lalu di kantor Gubernur Jakarta, Jokowi yang kaliatan baru turun dari oto, te baku rebe maso dalam kantor. Ia justru babelok sama itu kerumuman pengunjuk rasa yang ada sementara babatariak, kon langsung bapangge samua pengunjuk rasa supaya badekat sama dia. Dia juga langsung baduduk di lante, sampe itu pengunjuk rasa akhirnya so baku ikot baduduk di lante.
Depe gaya ini yang om susupo anggap luar biasa skali. Om susupo pikir, kalu samua pajabat yang bahadapi demo bapake cara itu, barangkali so te ada yang mo ba demo anarkis. Noh bagimana mo ba anarkis lagi, kalu so dipangge badekat, kon yang ada babataria so langsung dipangge baduduk sama-sama di lante.
Memang om susupo tau juga, ada kondisi-kondisi yang biasa baku beda. Tiap demo deng tiap depe isu tantu te sama, tagal itu depe cara bajawab juga te sama. Cuma kalu soal bahadapi, barangkali te ada depe salah juga kalu mo manyontek akan yang Jokowi ada pake. Jokowi barangkali so paham ini jiwanya pendemo, yang memang te suka kalu di hadapi deng tertutup atau dihadapi pake kekerasan. Dia yang bapake cara alus, ternyata justru bikin yang bademo jadi alus juga.
Mustinya memang, kalu ini pajabat bapake ilmu jiwa, so pasti bisa bapahami ini jiwanya masyarakat. Cuma memang yang penting juga, ini pajabat te talalo banyak salah. Kalu pajabat yang banyak salah, memang biasa alergi juga kalu mo baku-baku hadapi deng cara alus sama ini tukang demo. Depe kunci itu tadi, pajabat juga bakarja bagus, jang banyak babikin salah sama masyarakat, supaya kalu bahadapi demo bisa percaya diri dimukanya masyarakat…**
Dia juga langsung maso kaluar kantor lurah deng kantor camat, buat mo baliat itu kondisi pagawe lengkap deng depe model pelayanan buat rakyat kacili. Dan hasilnya, dia dapat ini pagawe-pagawe yang malas maso kantor atau suka babalambat maso kantor.
Yang om susupo anggap luar biasa, ada lagi berita di tv malam kamis kamarin, soal Jokowi pe cara batarima pengunjuk rasa. Biasa, ada yang om susupo liat rupa pusing bagimana depe cara mo bahadapi unjuk rasa. Ada di tampat laen yang sampe depe pajabat basambunyi, te mo baku temu deng tukang demo.
Tapi bukan Jokowi kalu te bikin yang luar biasa. Pas ada unjuk rasa hari Rabu lalu di kantor Gubernur Jakarta, Jokowi yang kaliatan baru turun dari oto, te baku rebe maso dalam kantor. Ia justru babelok sama itu kerumuman pengunjuk rasa yang ada sementara babatariak, kon langsung bapangge samua pengunjuk rasa supaya badekat sama dia. Dia juga langsung baduduk di lante, sampe itu pengunjuk rasa akhirnya so baku ikot baduduk di lante.
Depe gaya ini yang om susupo anggap luar biasa skali. Om susupo pikir, kalu samua pajabat yang bahadapi demo bapake cara itu, barangkali so te ada yang mo ba demo anarkis. Noh bagimana mo ba anarkis lagi, kalu so dipangge badekat, kon yang ada babataria so langsung dipangge baduduk sama-sama di lante.
Memang om susupo tau juga, ada kondisi-kondisi yang biasa baku beda. Tiap demo deng tiap depe isu tantu te sama, tagal itu depe cara bajawab juga te sama. Cuma kalu soal bahadapi, barangkali te ada depe salah juga kalu mo manyontek akan yang Jokowi ada pake. Jokowi barangkali so paham ini jiwanya pendemo, yang memang te suka kalu di hadapi deng tertutup atau dihadapi pake kekerasan. Dia yang bapake cara alus, ternyata justru bikin yang bademo jadi alus juga.
Mustinya memang, kalu ini pajabat bapake ilmu jiwa, so pasti bisa bapahami ini jiwanya masyarakat. Cuma memang yang penting juga, ini pajabat te talalo banyak salah. Kalu pajabat yang banyak salah, memang biasa alergi juga kalu mo baku-baku hadapi deng cara alus sama ini tukang demo. Depe kunci itu tadi, pajabat juga bakarja bagus, jang banyak babikin salah sama masyarakat, supaya kalu bahadapi demo bisa percaya diri dimukanya masyarakat…**