Jang main kasar…

sumber foto : Inilah.com

Ini kasus wartawan yang dipukul pas waktu ada baliput ta ulang lagi. Om susupo sandiri takaget baliat itu kajadian yang dapat shotingnya wartawan tv. Depe luar biasa, yang bapukul deng baceke wartawan yang sementara bafoto kasus pasawat tempur jatoh, di Riau sana, diduga perwiranya TNI Angkatan Udara. Om susupo anggap luar biasa, karna itu kalakuan dibikinnya perwira yang depe pangkat so Letkol, depe tanda pangkat so dua bunga.

Om susupo yang ada baliat siaran tv heran juga, kanapa kon itu perwira sampe depe tindakan bagitu itu. Memang ada depe pajabat yang ba alasan, karna kwatir depe dampak, sebab itu pasawat ada babawa peluru kata. Cuma yang bikin heran, kalu memang itu depe alasan, kanapa kon depe sasaran wartawan atau orang-orang yang ada bafoto deng ba ambe gambar.Kanapa itu anak-anak skolah deng masyarakat yang ada dipinggir-pinggir, te sampe di ceke…

Tapi yah, so bagitu itu kajadian. Dorang pe bos basar, itu Panglima TNI deng Menhankam so baminta maaf karna kalakuannya depe prajurit dilapangan. Om susupo yang baku-baku taman deng ini samua wartawan, sedih juga baliat itu kajadian. Apalagi yang baceke itu wartawan di Riau sana, depe pangkat perwira menengah, yang mustinya so paham skali deng ini aturan, mustinya tau soal karja-karjanya wartawan, kon itu kajadian juga ada di tampat umum, baru barang yang jatoh, bukan dompet pribadinya itu perwira, tapi pasawat yang dibili pake doi rakyat. Jadi memang so jadi tugasnya wartawan, buat baberitakan itu kajadian, kon musti badapat depe data-data dilapangan.

Om susupo pikir, mustinya itu perwira juga so tau deng samua aturan, karna wartawan bakarja juga diatur deng aturan.

Cuma kalu baliat itu kajadian, om susupo jadi heran juga, kanapa kon sampe bagitu sama wartawan. Mustinya kalu mo kase liat ganas, coba kase liat kasana sama negara laen yang biasa bakase liat dorang pe bajingan, deng bagara-gara di perbatasan macam yang biasa dibikinnya tentara negara tetangganya Indonesia. Karna trus terang om susupo biasa heran, kalu baliat ini pasukannya negara tetangga yang ada bakase liat dorang pe bajingan sama Indonesia. Bayangkan, biasa ini negara laen rupa so baku pandang enteng, kon dorang pe alat ada bapontar-pontar dipinggirnya Indonesia. Tagal itu, kalu memang mo bakase liat kahebatan, coba sama negara laen, jang kasian sama ini rakyat sandiri. Apalagi wartawan yang sementara bacari berita kan bukan musuh, bukan teroris, bukan juga panjahat. Jadi te parlulah maen kasar sama wartawan.

Om susupo saja tau banyak tentang Indonesia, jadi tau tentang Pilkada di Jakarta sana, jadi tau ada teroris yang ditangkap, jadi tau kalu ini Indonesia pe pulo-pulo diperbatasan biasa diganggunya negara laen, karna ada wartawan…Om susupo baharap, jang ada lagi yang maen kasar sama warawan. Kon kalu mo suka maen kasar, lebeh bae sama itu panjahat yang biasa bakorupsi doinya rakyat, atau sama negara laen yang kuat baganggu Indonesia.**